معلومات مهمة جدا إذا كنت تفكر السفر إلى تركيا

 #تركيا

#تركيا_ماشي_اسطنبول
غا نتكلم لكم اليوم على تركيا بالتفاصيل المملة . و من غا تخرج من هاذ الموضوع غا تلقى راسك استفدتي بزاف .
تركيا لهي واحد الدولة كتعتمد على السياحة بزاف داكشي لاش كتلقى كلشي ميسر فيها و غادي تلاحظ هادشي من أول ما غادي تحط رجليك في تركيا . غا تلقى الشرطة لمكلفة بالختم على الجواز ميسرين كيشد الباسبور ديالك كيطبع لك و يقولك دخل مع العلم ان المغاربة تم مرونينها يا كيمشيو على قبل الحريگ يا كاينين هاذوك الموميسات كيمارسو الدعارة و النصب . يعني وخا صورتنا موسخة ما كيعكسوش معانا .
و بنادم كيمشي لها بزاف لأن بلا فيزا و فيها ما يتشاف و هاذوك لكيمشيو غير لإسطنبول و يجيو يحكمو عليها الله يهديكم تركيا ماشي هي إسطنبول.
المهم بالنسبة لثمن الطائرة من 2600 درهم ذهابا و إيابا و انت طالع . و أرخص الخطوط لكاينين غا نحطهم لكم بالترتيب . Pegasus من بعد العربية من بعد Turkish airlines و royal air maroc .
راه وخا تشوف Pegasus رخيصة راه كيعطيو 20 كيلو غرام فابور و لبغيتي تزيد الكليوات غا تزيد الفلوس .
و البنسبة للتنقل وسط تركيا في الطائرة بين المدن كتلقى اغلبية ب 150 درهم و 200 درهم مع pegasus و Turkish Airlines و anadul.
بالنسبة الفنادق و الهوستلات من 4 اورو و انت طالع ... رخيصة هي في الفنادق و للإشارة بوكينغ ما كيخدمش في تركيا خاصك تبدل VPN و لا خدم بتطبيقات اخرى بحال agoda , hostels , Expedia , Airbnb ....
بالنسبة الأكل على حساب المكان لانت فيه تقريبا نفس الثمن للشوارمة و الكباب ... و في المناطق لغير سياحية أرخص ... اما بالنسبة لبغيتي طيب انت كاين من تقدى بالرخا bim و 101 ..
بالنسبة لتنقل تا هو الرخى الله .
كتشري واحد الكارطة مثلا لكنتي في اسطنبول غا تشري اسطنبول كارط . كطلعك في الباص و الميترو باص و الترام و الميترو و التيليفيريك و الباطوات و دخل بها تال لطواليط ،
مثلا الباص و الميترو و التيليفيرك ... كيكون ثمن الرحلة 4 دراهم و الميترو باص 7 دارهم
و الباطو مثلا لكنتي غادي لجزيرة الأميرات ب 15 درهم .
و لكنتي مثلا في مدينة اخرةى كتشري كارط أخرى.
بالنسبة لتنقل بين المدن عليك بتطبيق obilet كتحجز منو الكار . الكار عندهم كيتسمى كار بالوقت و نقي مزيان و كيعطوك القص ( عصير و مونادا و حلوى .. ) و يبقى يعطوك تا نقول براك .
و بالنسبة الطاكسيات حاول ما تشدهمش في تركيا كايكونو غالين و في شي ٱماكن كيخدمو النصب. المهم حسيتي به بغى ينصب عليك قوليه دور عند البوليس غا يتخلع و يتكمش. و لا بغيتي تفدى الغلاء و هادشي خدم بالتطبيقات مثل uber او I taxi تم كتحدد منين بغيتي تمشي و تلاش و كيعطيك الثمن بالظبط و كيكون رخيص.
بالنسبة الأنشطة تم فين تقدر تلقى أي شيئ بغيتي ديرو و بثمن مزيان منهم البراشيت و الغطس و المنطاد و الزعلولة في السماء . أي حاجة طاحت على بالك و نفسك فيها تقدر ديرها و أي حاجة غا تلقاها رخص من المغرب .
بالنسبة الناس لي بغى يتقدى الحوايج و الرخا الله ثاني و فين ما مشيتي سواءا في الشارع أو في المولات و أشهر mall هو venesia mall في اسطنبول كبير و اي شركة ملابس بغيتيها غا تلقاها فيه ؤ لا ما بغييتش تشري منو سير غا دور فيه لأنه داير بحال مدينة البندقية . و كاينين بزاف les malls في جميع مدن تركيا .
بالنسبة الأماكن السياحية :
عندك اسطنبول أشهر المدن و المميز فيها هو المساجد و المتاحف و حتى الجزر لحدها و في وقت الشتاء تقدر تمشي لبورسا قريبة لها و تمارس رياضة التزلج . بالنسبة للشواطئ الأفضل فيهم هم لعلى البحر الأبيض المتوسط : مارماريس فتحية أنطاليا ألانيا و گاع داكشي لجنبها .
بالنسبة لأشهر جوج الأماكن و لي جاو الوسط : پاموكالي لجات قريبة لمدينة ديزني و لفيها ينابيع الماء الساخنة و كبددوكيا المدينة المعروفة بالمناطيد و الصخور لفيها . و بجوج شي حاجة صداع خاصك تزورهم .
بالنسبة لعشاق الطبيعة :
عندك طرابزون و نواحيها . Hopa و نواحيها . ريزا و نواحيها و إقليم أوردو .
هاذ البلايص لذكرت راه كبار و ما نقدرش نشرح جميع البلايص لفيهم و لكن غا نحط رابط غير تكليكي عليه يديك المابس و غا تلقى فيه طراجي مقاد و انت دخل السميات و شوف البلايص . و انا على يقين غير تشوفهم غا تقول ضروري خاصني نمشي .
بالنسبة لناس لكتبقى تهضر غير بالفلوس و باغي يمشي . راه تم خدام مزيان تطبيق workaway لكتخدم مقابل شي حاجة يا فلوس يا المبيت و الأكل ... انت كتقرى و تختار و احسن اختيار هو قلب على غير ليعطيك المبيت و الأكل و تخدم غير الصباح مثلا تال ل 10 و تخرج تسرى . و كاين تطبيق couchsurfing لكي استضافك الواحد فابور .
و غا نعطيكم مثل 2 صحابي كل واحد مشى بوحدو في وقت مختلف و بزوج ريحو اكثر من شهرين ونصف و في هاذ الشهرين و نصف خسرو 4000 درهم و تسراو تركيا كلها . كانو كيعتمدوا على هاذ التطبيقات .
أما الناس لمرهونة بالوقت راه مغاديش تعتمد عليه لأنها مغاتغيش تربط وقتها بوقت واحد اخر .
الناس لكتمشي مجموعة من الأفضل كري سيارة في المطار تقريبا ب 100 درهم نهار و الضمانة كتحط غير شي 400 درهم .

المهم كاينين العديد من الأماكن لتسحتق الزيارة انا حطيت البلايص لي تقدر تلقى فيهم التعنكيش اما بحال أنطاليا و مارماريس و ألانيا حالهم ساهل و طراجياتهم باينين.
و بالنسبة اسطنبول :

مسجد Sultan Ahmet
مسجد aya Sofya
قصر Topkapı
Gülhane Park
Grand bazar/kapalı çarşı السوق المغلق
السوق المصري
Eminönü
منطقة Karaköy
منطقة Üsküdar بالجهة الآسيوية
منطقة Kadıköy بالجهة الاسيوية
منطقة الفاتح و خاصة مسجد الفاتح
تقسيم ( شارع الاستقلال / galata tower )
Haliç
مسجد السلطان أيوب و ركوب التلفريك لرؤية واحد من أجمل المناظر مع شرب كأس شاي بمقهى Pier Lotti
تلة العرائس بالجهة الاسيوية.
جزيرة الأميرات
صبنجا و المعشوقية / شيلا و أغوا ( منطقة قريبة من اسطنبول ، الذهاب يكون بالسيارة أو عبر شركات السياحة التي تنظم رحلات يومية ).

السلبيات
لكاينين في تركيا.
أولهم اللغة كتلقى مشكل من كتخرج من الاماكن السياحية بنادم ما كيهضرش بالانجليزية. داكشي لاش خاصك تعتمد على التطبيقات بالدرجة الأولى.
_الكارط-سيم غالية خصوصا في المطار. و الكونيكسيون مكيناش في مطار صبيحة و في المطار الجديد ديال تركيا كيعطوها لك غا 30 دقيقة. المهم الجوع في الانترنيت.

و إن شاء الله اليوم مع 23.30 غا ندير مباشر في الأنستغرام غا نشرح هادشي مزيان و كيفاش تمشي من المطار بأقل ثمن و جميع هادشي لمبهم