تخطيط الرحلة إلى أي دولة تريد تخطيط 90٪

 باش تسافر ضروري خاصك تخطط للرحلة ديالك بواحد 90%,أ تخلي 10℅ للمجهول،أ الوحيد لي يقدر يعاونك فهاد التخطيط هما التطبيقات لي ولاو كثر من الشتا في مجال السفر،باش بلاما تمشي عند مول سيبير باش يريزيرفي ليك لوطيل،ولا تمشي عند وكالة أسفار باش تشري ليك تدكرة الطيارة ولا تقاد ليك برنامج سفر،أ زيد أ زيد...هاد شي كامل أ كتر تقدر ديرو راسك إلا عرفتي التطبيقات لي غادي يعاونوك فالسفر أ كيفاش كيخدموا.ونا ليوم إ ختاريت ليكم مجموعة من التطبيقات لي جربت ألي كنصحكم تجربوها.مكاينش غير هادو كاين الألاف ديال التطبيقات المشابهة.

1/Transport aérienne ✈️🛩

¶Skyscanner
واحد من أشهر محركات البحث لي كيمنك باش تلقا تذكرة لي بغيتي بارخص الاثمنة عن طريق المقارنة بين عشرات شركات الطيران.كيمكنك ليك تلقا أرخص الوجهات من مدينتك ولا دولتك،أ حتا فأرخص الفترات لي يمكن ليك تسافر فيهم،خصوصاإلا كانت عندك المرونة في الوفت أ حتا فالوجهة.نصيحة ديما ملي تلقا التدكرة لي بغيتي حاول تقارن الثمن ديالها معا الثمن الموجود فموقع شركة الطيران المعنية بالامر.كيفما يمكن ليكم تحجزوا لوطيل أ حتا طوموبيل من التطبيق،أ نا صراحة كنستعل غير حجز تداكر الطائرة.
¶Hopper
واحد من أحسن التطبيقات عند المسافرين في حجز التداكر،حيت كيعطيك جدول كيتضمن الاتمنة لي كتكون عبارة علا ألوان خضر ليموني حمر،لي كتحدد تقربيا الثمن ديال التدكرة،بالإضافة كيمكن يسيفط ليك نوتيفيكاسيون للرحلات لي نتا متبعهوم باش يرخاصو،أ كيعطيك تا الديطاي علا الرحلة ديالك بحال الوزن ديال لباكاج،إختيار بلاصة فين تجلس.....
¶Rayanair
محبوبة الجماهير أ وحدا من أرخص شركات الطيران،تقدر تلقا فول ب 2 دراهم هههه والله حتا داوي معاكم،كدير لي فول بين أوروبا أ المغرب،أغلبية الوقت كتربط بين المطارات الثانوية،مكيكونش فيها القص،يعني بغيتي تاكل خلص،أ ردوا البال راه كيكنطروليو الوزن أ الحجم،ديال الباكاج،ولا لقاوهم زايدين كتخلص زبالة ديال لفلوس.

2/Transport commun 🚕🚌

¶Uber
من اشهر التطبيقات ديال التنقل داخل المدينة،كيخليك تختار الجهة ديالك مين أ حتا لين،نوع الوسيلة لي بغيتي،أ حتا كيفاش تخلص واش كاش ولا بكارطة أحتا Paypal,أمافيه لا نصب لا والو حيت كتكون عارف شحال غادي تخلص
¶Grab
هاد التطبيق ديال التنقل وسط لمدينة كاتلقاه غير فدول جنوب شرق آسيا،كتختار الوجهة ديالك أ هو كيعطيك أقرب طاكسيات لي دايرين بيك مع ثمن الرحلة،كيمكن تخلص كاش ولا ب كارطا لي كدخلها فالتطبيق،أ كتعطي تا الانطباع ديالك علا السائق،أ حتا هو كيدير نفس الشيء،ردو البال كينين شي مناطق ممنوع يدخل ليهم Grab ولا دخل كيهرسوه،بحال ubud ف bali

3/Hebergement 🛌🚿

¶Hostelword
هاد التطبيق خاص بالحجز فنزل الشباب،لي كيكون خاص بالناس لي عندهم ميزانية ناقصة،ولا الناس لي عزاز عليهم يتلاقاو بناس من جنسيات مختلفة باش يشاركوا التجارب ديالهم،كيمكنك تاخد إما غرفة مشتركة مع بزاف الناس بحمام مشترك،ولا غرفة فردية،المهم الأثمنة كتكون أرخص من بزاف ديال الفنادق،كيفما يمكن ليك تلقا فطور شامل،أ بعض اللعب الجماعية داخل الهوستيل ،أحتا بعض النشاطات.
¶Booking
واحد من أشهر المواقع ديال حجز المبيت : أوطيل،هوستل،أبارطمان...أ ماشي هو الرخيص طبعا،ولكن الحاجة لي مزيانة فيه هو تقدر تحجز أ بلاما تخلص حتا لنهار لي غتوصل فيه،كتلقا فيه بزاف ديال لي فيلتر علا الأثمنة لي بغيتي،نوعية المكان واش اوطيل،ولا هوستيل..القرب من وسط المدينة أ بزاف ديال لحواج لي غنخليكم تكتاشفوها..الا كنتو كتحجزوا بزاف مع بوكيبغ،تقدروا يولي عندكم Niveau 2 genius ،لي كيحيد ليكم 15%،علا كل حجز زيد فطور ديما كاين فابور،أ تقدر تاخد تا غرف مجانية بعض المرات.
¶Couchsurfing
هاد التطبيق خاص بالناس لي مكتبغيش تخلص ثمن المبيت،أ كتبغي تعرف علا تقافة الناس فبيوتهم،أ تعيش مع السكان المحليين.فالتطبيق غتلقا الناس لي كيرحبوا بالمسافرين يباتوا عندهم،بجميع البيانات الخاصة بيهم،كيفما تقدوا تستعملوا التطبيق غير باش تلاقاو بالسكان المحليين ولا بعض السائحين أ تقهواو معاهم،ولا ضربوا دويرة.إلا بغيتي يكون عندك الحظ باش يستقبلك شي واحد خاص يكون الناس لي سبق تلاقيتي معاهم خلاو عليك إنطباع زوين،باش يمكن يتيقوا فيك.أنا سبق ليا عشت هاد التجربة جوج مرات،فألمانيا و بولندا.
¶Airbnb
واحد من التطبيقات لي رخيصة فحجز الغرف أ حتا الشقق،كيمكن ليك تواصل مع مول المكان لي غادي يكريه ليك،الاثمنة رخيصة فيه غير هو خاصك تخلص ملي كتريزيرفي،أخاص يكون عندك حساب فيه كاع البيانات ديالك،بما فيهم الباسبور ديالك.سبق ليا جربتوا ثلالثة لمرات أحسن وحدا فيهم كانت ديال النرويج.

4/Communication 📢🗣

¶Google traduction
تطبيق معروف عند أغلية الناس أ غادي ينفعك برا ملي كتمشي لشي دولة نتا مكتهدرش لغتهم،ولا مكيناش شي لغة مشتركة بيناتكم .كيفما تقدر ترجم بيه شي menu ديال ماكلة،كتابة ديال ديال شي produit بطريقة ساهلة،معليك غير تاخد تصويرة لداكشي لي غترجم،تختار لغة لي باغي ترجم ليها أ هانتا فهمتي أشنو مكتوب،كيفما تقدر تسجل الهدرة ديال شي واحد مفهمتيش لغتو،أ تختار الغة، أ التطبيق كيتكلف بالباقي.غير هو ضروري من الانترنيت باش دير هاد لعجب.
¶Trouver internet gratuit
هاد التطبق كيعطيك ليستا ديال لي wifi لي قراب ليك سواءا كانو فابور و لا بكلمة السر،كيفما كيمنك تشوف الصبيب ديالهم أ حتا قوة الإشارة.
¶Travel safe
دليل لي كيشمل الأرقام المهمة ديال بزاف ديال الدول،بحال نمرة لبوليص،الاسعاف،رجال الاطفاء....أزيد أ زيد
¶Linguee
هادا عبارة علا معجم لي كتقدر تحمل الترجمة ديال جوج لغات أ تخدم بيه بلا أ نترنيت،الحاجة لي ناقصة فيه هو مكيعطيكش بزاف ديال اللغات.

5/Transport Entre ville/pays 🚌🚆

¶Busradar
هاد التطبيق غادي ينفعك فأوروبا أ بريطانيا،باش تلقا أرخص الاثمنة للتنقل فأوروبا،داخل فيها Bus،train أ حتا covoiturage ،أ كيلقا ليك أقرب المحطات لي دايرين بيك،كيقارن فالاثمنة،الوقت أ حتا الراحة ديال كل تراجي،بالاضافة أنك كدخل نيشان لمواقع الحجز ديال شركات النقل.
¶Flixbus
بهاد التطبيق يمكن ليك تسافر فاوروبا كاملة،معليك غير دخل الوجهة ديالك،النهار لي غاتسافر فيه،واش دهاب ولا إياب،ولا غير دهاب،أهو كيعطيك گاع الإمكانيات لي كاينة مع الاثمنة،الوقت أ حتا الاماكن لي غتكون فيها تغيير الحافلة أ المدة ديال الإنتظار.كيمكن ليك تخلص بكارط بنكية،paypal,Sofort,iDeal.
أنا صراحة قليل فين كنستعملوا حيت غالي أ كيدي ليك الوقت بزاف،خصوصا دابا التداكر الجوية ولات رخيصة.

6/Navigation🚦🚏

¶Maps.me
من افضل التطبيقات لي عندي حيت مكيخليك تسول تاواحد أي بلاصة كتلقاها فيها أبلاما تحتاج connexion ،غير GPS قادي الغاراض،خصك غير تحمل الخريطة ديال بلاصة لي غادي ليها،أ هانتا زاز لوز.كيفما كتقدر تعلم لبلايص السياحية ، لوطيل لي غتنزل فيه،محطة لكيران أي بلاصة نتا باغي،أ فيها واحد لميزة ديال لبحث علا الأماكن لي غاتحتاج أ قريبة لبلاصة لي نتا فيها،بحال المطاعم،الفنادق،سييطارات أ زيد أ زيد.
¶Rome2rio
هاد التطبيق كدخل ليه الوجهة ديالك منين حتا لين(وخا ماشي فنفس القارة) أ هو كيتكلف باش يعطيك أقرب تراجي لي تقدر دير،أ وسائل النقل لي غا تستعمل،الثمن ديالهم،أ حتا لوقت لي غتستغرق فكل وسيلة.
¶Google Maps
تقريبا بحال maps.me،تاهو كيخدم بلا كونكسيون،بشرط تيليشارجي لبلاصة لي نتا غتمشي ليها،غير أنا كنفضل تطبيق maps.me

7/Nouritture 🍱🍕☕️

¶Yelp
هاد التطبيق كيعطيك الاماكن لي قراب ليك أ فين تقدر تاكل بأرخص الاثمان،أ كيمكنك تشوف حتا لكريتيك ديال الناس لي جربوا نفس الاكلة،ولا نفس المطعم،أ وجهة النظر ديالهم.للاسف مكيتوفرش علا مراجعات في الدول العربية.
¶Four Square
تطبيق 100% خاص بالأكل و الترفيه،كيمكنك تختار الاماكن لي تقدر تفطر فيهم،تغدا،تعشا،ولا غير تاخد قهيوة،زيد عيهم حتا لبلايص فين تقدر تسهر ولا تفوج فيهم.كل بلاصة اختاريتيها كتلقا فيها التقييم ديال الناس لي جربوها،أ تعاليق لي خلاو عليها،أ حتا بعض النصائح،كيفما كتلقا معلومات عامة علا المكان أ حتا بعض الصور عليه.زيد علا هادشي كتلقا فيلتر علا الاثمنة،الويفي،كيفية الأداء، ،إمكانية التوصيل...

8/Gestion Budget 💰💶

¶Splitwise
هاد التطبيق كيليق بزاف للناس لي كتسافر فمجموعات(إبتداءا من 2)،باش بلاما تحتاجوا كل مرة تحسبوا،أسيدي التطبيق كيتكلف،معليكم غير لي خسر شي حاجة يدخلها فالتطبيق،أ فلخر كيجمع ليكم لحساب،أ كل واحد كيعرف شحال خصو يخلص للآخرين
¶XE Currency
هو عبارة علا محول ديال العملات،لي كيعونك تعرف الثمن ديال الصرف التقريبي باش متعرضش للنصب،أ تقدر تستعملوا بلا أنترنيت

9/Photographie 📸📹

¶Snapspeed
تطبيق ساهل الإستعمال،فيه بزاف ديال لي فيلتر،باش تقدر تموديفي تصاوك خفا زربا،و تبارطجيهم مع صحابك فمواقع التواصل
¶Lightroom
واحد من أشهر تطبيقات التعديل علا الصور،ماشي كلو فابور و لكن النسخة المجانية تقدر تخدم بيها مخير،كيفما تقدر تحمل presets،وتموديفي تصاورك ب،أنا هو باش كنخدم

10/Météo ☀️🌧🌪

¶The weather channel
تطبيق جد مهم كيساعدك باش تعرف توقعات حالة الجو فالبلاصة لي نتا غادي ليها،كيعطيك معلومات علا حالة العامة
لجو لمدة 15 يوم،فيها درجة الحرارة،التوقعات المطرية أ سرعة الرياح.كيفما كيعطيك التتبع ديال ساعة بساعة لمدة 72 ساعة لي كتشمل نسبة الرطوبة،كمية التساقطات،الحرارة المرتقبة،أزيد عليها حتا مؤشر الاشعة فوق البنفسجية،كيفما كيعطيك حالة الثلوت فالمنطقة لي نتا فيها اأ زيد عليها كيمكنك بالتوصل بإنظارات علا حالة الطقس(الثلج،الشتا،العواصف،الرعد،البرق،.....)،صراحة تطبيق لي ضروري يكون عندك باش تعرف أشنو دير فالصاك ديال السفر ديالك.

11/Activities 🕌⛩🏂

¶Visit A City
من أهم لحوياج فالسفر هي المعالم لي غنشوفو،النشاطات لي غنديرو،أ لبلايص لي غادي نزورو،مع هاد التطبيق كيمكنك باش دخل للأشهر الأماكن،أ البرامج لي تقدر دير فالمدينة لي نتا غادي تزور،كيعطيك تا أتمنة الدخول للمآثرأ كيقترح عليك شحال تبقا فهاد لمدينة أ برامج يومية باش تشوفهاوأ تكتشفها،كيفما كيقترح عليك أماكن للأكل و الشرب قريبة ليك.أ هادشي كلو فابور أ بلا ويفي

لي عندو شي تطبيق، خاص بالسفر، لي يقدر يشاركو معانا،ما يبخلش علينا بيه أ يحاول يشرح لينافالتعليق المزايا ديالو أ لاش كيصلح.
أ هادشي إلا درنه راه غير باش نستهلكو بلاما نتهلكوا